60 sene w 70 yom

شو بيعملو تنين مجوزين من أول ليلة عرسهن؟؟
بقضّوا حياتهن مع بعض لعمر ال ٨٦ ! عمر الرجّال بس ... 
والرجّال بيموت والمرا بعدها، مدري كيف، بعمر التلاتين...
من أول ليلة في شي غلط.
تاني نهار في شي غلط.
بعد سنة، سنتين، بعد خمس سنين في شي غلط. 
وسنة ورا سنة وعمر ورا عمر،
تا يموت الرجّال فقع،
ويرجع شبحو يطلّ عا مرتو وبعد في شي غلط:


"يحرق رفك... ليش بعدك صبيّة وأنا تختخوا عضامي..."


والغلط مكفّى حتى من بعد ما مات، مع شوية فرق إنو صار فيه يعمل اللي بدو ياه ويقول اللي بدو ياه:


" كل عمري كنت حاسس حالي عايش مع السلطان سليم،
أوضتنا، بودروم...
تختي انقرة...
وفي أزمير فايت بقفايي وعم يدق: أضنه... أضنه."


سبعين يوم ، من أول ليلة، وكل يوم في إكتشاف جديد.
شهرين وتسع ايام بالظبط، كانوا كافيين لتحضير جبهة ومتراس واحد: "متراس المرا"
وخط التماس كان: التخت.
هالتخت اللي شهد من بعد سبعين يوم، على ستين سنة مناحرة وقهر ، على تفاصيل ما بتدخل براس انسان إلا من بعد ما يموت.
وكل شي كان ممنوع تحت صار فوق مسموح.
وحدو التخت بقي، ورفّاصاتو بعدن مناح، بس لشو!... 
متل ما بقول المتل، "ستين سنه وسبعين يوم "...
والباقي عا التخت.

**********************************************************

* قصة حياة هزلية، بمسرحية ساخرة من سبعين دقيقة.
كتابة وإخراج: غبريال يمين
بطولة: ميشال أبو سليمان ، رولا بقسماتي... وشي تخت